Ə.Əliyev adına Azərbaycan Dövlət Həkimləri Təkmilləşdirmə İnstitutunda təqvim planına uyğun olaraq həkimlərin diplomdansonrakı təhsilinin Davamlı Tibb Təhsili konsepsiyası çərçivəsində təşkil edilməsinə böyük önəm verilir. Bu konsepsiyaya uyğun olaraq ixtisasartırma kurslarına cəlb edilən müdavimlərin insanların sağlamlığının qorunması ilə bağlı həyata keçirilən tədbirlərdə ən müasir yanaşmalara dair bilik və bacarıqlarının artırılması üçün onlara geniş məlumatlar təqdim edilir. Bu zaman institut müxtəlif kafedralarında birğə mövzular üzrə fəaliyyət göstərərək müştərək dərslərin aparılması da geniş tətbiq edilir.
Bu tədris ilində institutun pediatriya və terapiya kafedraları ilk dəfə olaraq belə bir kursu gerçəkləşdirmişlər. Beləki, allerqologiya üzrə mütəxəssis, uzun illər böyük təcrübəyə malik olan pediatriya kafedrasının müdiri professor Rəqsanə Məmmədovanın rəhbərliyi altında yaxın günlərdə əməkdaşlıq haqqında imzalanmış müqaviləyə əsasən kafedranın yeni kliniki bazası olan “Liv Bona Dea Hospital”da həkim-terapevtlərə “Allerqologiyada müayinə üsulları və immun xəstəliklərin diaqnostikası” adlı kurs keçirilmişdir. Müdavimlərə allergik vəziyyətlər, onların diaqnostikası və müalicə prinsiplərinə dair həm nəzəri biliklər, həm də təcrübi bacarıqlar təqdim edilmişdir.