10-12 oktyabr 2025-ci il tarixlərində Bakı şəhərində Azərbaycan Radioloqlar Cəmiyyətinin 5-ci Beynəlxalq Elmi-Praktiki Konfransı keçirilmişdir. Tədbirdə Azərbaycan radioloqları ilə yanaşı ABŞ, Türkiyə, Qazaxıstan, Belçika, İtaliya, Avstriya və Çin kimi ölkələri təmsil edən mütəxəssislərin iştirakı ilə geniş elmi proqram həyata keçirilmişdir. Proqramda radiologiya sahəsindəki son yeniliklər, innovativ texnologiyalar və müasir tibbi avadanlıqlar təqdim edilmişdir.
Konfransı giriş sözü ilə Azərbaycan Radioloqlar Cəmiyyətinin sədri Yunus Əfəndiyev açmışdır. Ə.Əliyev adına Azərbaycan Dövlət Həkimləri Təkmilləşdirmə İnstitutunun prorektoru t.e.d. Adilə Rzayeva da çıxış edərək tədbir iştirakçılarını salamlamış və konfransın işində uğurlar arzulamışdır.
Tədbirdə Ə.Əliyev adına ADHTİ-nin şüa terapiyası kursu ilə şüa diaqnostikası kafedrasının əməkdaşları aktiv iştirak etmişlər. Kafedranın müdiri dosent Arzu Nuriyeva konfransın 2-ci sessiyasının moderatoru olmuşdur.
Həmin konfransla eyni zamanda daha bir beynəlxalq tədbir -“Visiting Professorship Programme” çərçivəsində European School of Radiology (ESOR) ilə əməkdaşlıq əsasında əzələ-skelet sistemi radiologiyasına dair mühazirələr və praktiki sessiyalar da keçirilmişdir. Tədbirdə müxtəlif ölkələrdən dəvət edilmiş tanınmış radioloqlar iştirakçılarla öz elmi bilik və klinik təcrübələrini paylaşmış, praktikada rast gələn mürəkkəb məsələlərin həlli yollarını göstərmişlər.