13.10.2025-ci il tarixində Ə.Əliyev adına Azərbaycan Dövlət Həkimləri Təkmilləşdirmə İnstitutunun rektoru professor Nazim Pənahovun institutda təhsil alan rezidentlərlə görüşü keçirilmişdir. Professor N.A.Pənahov rezidentlərə müraciətində institutun şanlı tarixindən danışmış, onun Azərbaycan səhiyyəsində xüsusi yeri olduğunu qeyd etmiş, burada çalışmış və hal-hazırda çalışan alim və mütəxəssislərin tibb elminə və praktik səhiyyə verdiyi töhfələrdən bəhs etmişdir. Bildirilmişdir ki, hal-hazırda Ə.Əliyev adına ADHTİ-nin müxtəlif kafedralarında 33 ixtisas üzrə 257 həkim-rezident təhsil alır. Onlarin yüksəkixtisaslı mütəxəssislər kimi hazirlanması üçün institut əməkdaşları bütün texniki vasitələrdən və innovasion texnologiyaların verdiyi imkanlardan maksimum yararlanaraq tam həçmdə fəaliyyətlərini davam etdirirlər.
Rektor çıxışında bu il TQDK-nin keçirmiş oldugu rezidentura səviyyəsinə qəbul zamanı yüksək bal toplamış 3 nəfərin parodontologiya, oftalmologiya və plastic cərrahiyyə ixtisasları üzrə institutun rezidenturasına qəbul olunmasını xüsusi qeyd etmişdir. O, həmin rezidentləri - Elnur Əhmədov, Sabir Novruzov və Tovuz Adıyevanı təbrik edərək onlara uğurlar arzulamış və hər üçünü bu ilin dekabr ayında keçiriləcək institutun 90 illiyinə həsr olunmuş yubiley konfransına şəxsən dəvət etmişdir.
Sonra professor Nazim Pənahov qeyd etmişdir ki, əldə olunmuş nailiyyətlərə baxmayaraq rezidentura təhsilində də bir sıra çatmamazlıqlar var və onların aradan götürülməsi üzərində daimi iş aparılır. O, həmin çatmamazlıqları analiz edərək onların həllində rezidentləri də aktiv olmağa çağırdı.Rezidentlər tərəfindən olan istənilən təkliflərə həm rezidentura şöbəsinin,həm də rektorluğun həmişə açıq olduğu qeyd olundu.
Çıxışının sonunda rektor rezidentlərin vəzifə və öhdəliklərini xatırladaraq onların öz üzərlərində daim çalışmalı olduqlarını söylədi və onlara təhsillərində müvəffəqiyyətlər arzuladı.
Rektor professor Nazim Pənahov çıxışının ardınca rezidentlərin çoxsaylı suallarını cavablandırdı və bəhs edilən problemlərin həlli yollarını göstərdi.
Görüşdə institutun prorektorları t.e.d. Məhəmməd Davudov, dosent Rüfət Hüseynli, t.e.d. Adilə Rzayeva, rezidentura şöbəsinin müdiri Arzu Hüseynova və rezidentlərin kuratorları iştirak etdilər.