Keçən həftə Berlində növbəti Birləşmiş Avropa Qastroenteroloji Həftəsi (UEG Week 2025) keçirilmişdir. Bir il ərzində keçirilmiş bütün qastroenteroloji tədbirlərin yekunu olan bu tədbir əslində təkcə Avropadan deyil, həm də digər qitələrdən olan daxili xəstəliklər, qastroenterologiya və cərrahiyyə ilə yanaşı, qidalanma üzrə mütəxəssislər, radioloq və onkoloqlar üçün də böyük elmi və klinik məktəbə çevrilmişdir. Həftədə hazırlanan və artıq çap edilmiş kliniki rəhbərliklərin (tövsiyələrin) təqdimatı baş tutmuşdur. Qastroenteroloji həftə diplomdan sonrakı tədrisdən başlayaraq həzm aparatının xərçəngi ilə bağlı suallar, o cümlədən skrininq problemləri məktəbi ilə davam etmişdir. Bu tədrisin daxilində isə TOGAS (Mədə xərcəngi skriningi üzrə Avropa layihəsi) proyektinə xüsusi yer ayrılmışdır.
Tədbirdə ölkəmizi Ə.Əliyev adına Azərbaycan Dövlət Həkimləri Təkmilləşdirmə İnstitutunun terapiya kafedrasının dosenti Gülüstan Babayeva və kafedranın qastroenterologiya ixtisası üzrə doktorantları Rəşad Həsənov və Emin Məmmədov 5 beynəlxalq layihə çərçivəsində elmi tədqiqatın nəticələrinə həsr edilmiş işlər ilə təmsil etmişlər.