4 oktyabr 2025-ci il tarixində Azərbaycan Respublikası Səhiyyə Nazirliyi, K.Y.Fərəcova adına Elmi-Tədqiqat Pediatriya İnstitutu, Azərbaycan Tibb Universiteti və Azərbaycan Uşaq Cərrahları Assosiasiyasının birgə təşkilatçılığı ilə “Uşaqlarda reproduktiv sistemin patologiyalarına və cinsi anomaliyalara multidissiplinar yanaşma” mövzusunda elmi-praktik konfrans keçirilmişdir. Tədbirin əsas məqsədi uşaqlarda reproduktiv sistem pozuntularının və cinsi inkişafla bağlı anomaliyaların diaqnostikası və müalicəsində multidissiplinar yanaşmanın vacibliyini vurğulamaq, bu sahədə fəaliyyət göstərən mütəxəssislər arasında əməkdaşlığı gücləndirməkdən ibarət olmuşdur.
Ə.Əliyev adına Azərbaycan Dövlət Həkimləri Təkmilləşdirmə İnstitutunun pediatriya kafedrasının müdiri professor Rəqsanə Məmmədovanın həmmoderator olduğu “Pediatrik endokrinologiya” panelində uşaqlarda yaş dövrlərindən asılı olaraq cinsi inkişafın xüsusiyyətləri, adrenogenital sistem pozğunluqlara pediatrın yanaşması, vaxtından əvvəl cinsi yetişkənlik, anadangəlmə adrenal hiperplaziya, mozaik Terner sindromu, eləcə də erkən cinsi inkişaf zamanı final boy proqnozuna müasir yanaşmalar kimi aktual mövzularda elmi çıxışlar edilmişdir.