Xəbər verildiyi kimi Azərbaycan Respublikası Mədəniyyət Nazirliyinin təşkilatçılığı ilə 1-7 oktyabr 2025-ci il tarixində Bakı Ekspo Mərkəzində XI Bakı Beynəlxalq Kitab Sərgisi keçirilir. Sərgi müddətində 250-dən çox tədbirin təşkili nəzərdə tutulmuşdur. Həmin tədbirlərdə dünyanın bir çox ölkələrindən olan görkəmli yazarlar və elm adamlarının əsərlərinin təqdimatı keçirilir.
Belə təqdimatlardan biri də bu gün baş tutmuşdur. Beləki, Bakı Ekspo Mərkəzinin “Bəxtiyar Vahabzadə” təqdimat zonasında “Tireoidologiya və incəsənət” kitabının təqdimatı keçirilmişdir. Təqdimatın açılışını “Şərq-Qərb” nəşriyyatının baş redaktoru Nərgiz Cabbarlı etdi. Kitab Ə.Əliyev adına Azərbaycan Dövlət Həkimləri Təkmilləşdirmə İnstitutunun terapiya kafedrasının əməkdaşlarının birgə əməyinin məhsulu kimi ərsəyə gəlmişdir. Təqdimatda kitabın həmmüəllifləri olan Ə.Əliyev adına Azərbaycan Dövlət Həkimləri Təkmilləşdirmə İnstitutunun terapiya kafedrasının müdiri, Azərbaycan Endokrinologiya, Diabetologiya və Terapevtik Təlimat Assosiasiyasının sədri t.e.d. Valeh Mirzəzadə, həmin kafedranın dosenti, Azərbaycan Endokrinologiya, Diabetologiya və Terapevtik Təlimat Assosiasiyasının sədr müavini t.ü.f.d. Sədaqət Sultanova, kafedranın assistenti, Azərbaycan Diabet Cəmiyyətinin sədri t.ü.f.d. Aygün Hüseynova və “Şərq-Qərb” nəşriyyatının departament direktoru Sevil İsmayılova çıxış etdilər. Kitabın diğər həmmüəllifləri olan institutun terapiya kafedrasının doktorantı Abbasova Leyla, baş laborantları Əliyeva Aygün, İsmayılova Sevil və “Yovşan” klinikasının baş həkimi Xoşbəxt Ağayeva da təqdimat mərasimində iştirak edirdilər. Təqdimat maraqla qarşılandı və sərgidə iştirak edən yerli və xarici qonaqlar kitab ilə yaxından tanış oldular.