Ə.Əliyev adına Azərbaycan Dövlət Həkimləri Təkmilləşdirmə İnstitutunun Cərrahiyyə klinikası 20.03.1988-ci ildən fəaliyyət göstərir. Bu illər ərzində klinikanın əməkdaşları institutun elmi-praktik və klinik bazalarından biri olaraq əhaliyə yüksək səviyyəli cərrahi tibbi yardımın göstərilməsi sahəsində fəal iştirak etmişlər. Azərbaycan Respublikası Səhiyyə nazirinin 16 yanvar 2014-ci il tarixli 6 saylı “Plastik və rekonstruktiv cərrahiyyə klinikasının yaradılması barədə” əmri ilə yanıqlar, travmalar və digər xəsarətlər nəticəsində meydana çıxan müxtəlif qüsürların cərrahi yolla müalicəsinin təşkili məqsədilə Ə.Əliyev adına ADHTİ-nin Cərrahiyyə klinilasının adı dəyişdirilərək Ə.Əliyev adına ADHTİ-nin Plastik və Rekonstruktiv Cərrahiyyə Klinikası adlandırılmışdır.
Məlum olduğu kimi, bu yaxınlarda Azərbaycan Respublikasının Səhiyyə naziri cənab Teymur Musayevin göstərişinə əsasən həmin klinikada əsaslı təmir işlərinə başlanılmışdır. Ə.Əliyev adına ADHTİ-nin rektoru professor Nazim Pənahov təmirin gedişi ilə tanış olmaq üçün klinikada olmuşdur. Klinikanın yeni təyin olunmuş baş həkimi Dilqəm Məmmədov və təmirə məsul şəxslər rektora hal-hazırki vəziyyət haqqında məlumat vermiş, tikinti gedən sahələri ona göstərmişlər. Professor Nazim Pənahov təmirin nəzərdə tutulan müddət ərzində bitirilməsinin önəmli olmasını bir daha qeyd etmişdir. Rektor klinikanın əməkdaşlarlı ilə də görüş keçirmiş, qarşıya çıxan problemlərin həll olunması üçün birlikdə çalışmağın vacıb olduğunu söyləmişdir.