23-27 sentyabr 2025-ci il tarixlərində İrlandiyanın paytaxtı Dublin şəhərində keçirilən Avropa Üz Plastik Cərrahiyyə Akademiyasının 48-ci beynəlxalq illik yığıncağı (EAFPS 2025) keçirilmişdir. Bu toplantı dünya üzrə ən nüfuzlu plastik cərrahları və otorinolarinqoloqları bir araya gətirən ənənəvi elmi platformadır və elmin son yeniliklərinin təqdim edildiyi beynəlxalq miqyaslı hadisə kimi böyük əhəmiyyət daşıyır. Dünyanın müxtəlif ölkələrindən gəlmiş yüzlərlə iştirakçı bu tədbirdə rinoplastika, üz plastikası, estetik rekonstruksiya və funksional cərrahiyyə sahəsində ən son yeniliklərlə tanış olmaq imkanı qazanmışdır.
Toplantıda Ə.Əliyev adına Azərbaycan Dövlət Həkimləri Təkmilləşdirmə İnstitutunun otorinolarinqologiya kafedrasının dosenti Məzahir Quliyev “İnnovativ Rhino-Graft texnikası və Piezo osteotomiya metodikası ilə revizyon rinoplastikada yanaşma” mövzusunda məruzə ilə çıxış etmişdir. Məruzədə həm yeni innovativ yanaşma olan Rhino-Graft tətbiqi texnikası və həm də ilk dəfə təklif olunmuş yeni fiksasiya metodu haqqında məlumat verilmişdir. Bu zaman patenti alınmış xüsusi alətlə icra edilən Piezo Guiding Osteotomy metodikası da ətraflı təqdim olunmuşdur. Çıxış zamanı qeyd edilmişdir ki, bu yanaşmalar revizion rinoplastika əməliyyatlarında rast gəlinən çətinliklərin qarşısını almaqda, əməliyyat sonrası estetik və funksional nəticələrin daha dəqiq və etibarlı əldə olunmasında mühüm rol oynayır.
Məruzə həmkarlar tərəfindən böyük maraqla qarşılanmışdır. Bu zaman toplantıda iştirak edən mütəxəssislər Azərbaycan nümayəndəsinin elmi yanaşmasını rəğbətlə qarşılamış, təcrübə mübadiləsinin əhəmiyyətini xüsusi qeyd etmişlər.