23-25 may 2025-ci il tarixində Bakı şəhərində Ə.Əliyev adına Azərbaycan Dövlət Həkimləri Təkmilləşdirmə İnstitutunun təşkilati dəstəyi və ev sahibliyi ilə Azərbaycan Peşəkar Ortodontlar Cəmiyyətinin, ölkəmizin müxtəlif şəhərlərdən olan 60-dan çox ortodontunun iştirakı ilə, “Pitts fəlsəfəsi” konqresi keçirildi. Konqresdə dəvətli mətuzəçi kimi tanınmış mütəxəssis, ABŞ-da yerləşən LECOM (Erie Gölü Osteopatik Tibb Kolleci) Ortodontik Araşdırmalar Mərkəzinin direktoru Duncan Brown iştirak etmişdir.
Konfransın 1-ci günü Dr. Duncan Brown, Azərbaycan Dövlət Həkimləri Təkmilləşdirmə İnstitutunun ortodontiya kafedrasının əməkdaşları kafedra müdiri t.e.d. Ziba Qasımova, dosent Orxan Qasımov, baş laborant Fidan Əliyeva, ATU-nun ortodontiya kafedrasının müdiri t.e.d. Ramidə Şadlinskaya tərəfindən təqdim olunan məruzələrdə estetikaya, biomexanikaya, torqa və müasir breket sistemlərinə dair ən son yanaşmalar geniş şəkildə müzakirə olundu, “Pitts fəlsəfəsi”nin klinik tətbiqləri, yüksək nəticələr və praktiki tövsiyələr təqdim edildi.
Konfransın 2-ci günü praktik Master-klass keçirildi. İştirakçılar “Pitts-21” breketlərinin 3D model üzərində tətbiqi ilə bağlı praktiki bacarıqlar qazandılar. Dr. Duncan Brown və Dosent Orxan Qasımov həmin gün ərzində fəlsəfənin dərin izahını təqdim etməklə iştirakçıların nəzəri və praktiki anlayışlarını gücləndirdilər.
Konfransın 3-cü günü “Mini Masters” formatında Master-klass keçirildi. Azərbaycanın müxtəlif bölgələrindən olan ortodontlar tərəfindən təqdim olunan 10 real klinik hal Dr. Duncan Brown tərəfindən təhlil edildi və “Pitts fəlsəfəsi”nə uyğun müalicə planları tərtib olundu. Həmin gün iştirakçılar üçün nadir öyrənmə və qarşılıqlı fikir mübadiləsi imkanları yarandı.
Konfransda ölkəmizin reğionlarında çalışan həkim-ortodontların etdikləri çıxışlar da maraqla qarşılandı.
Tədbirin önəmli iştirakçıları arasında Ə.Əliyev adına Azərbaycan Dövlət Həkimləri Təkmilləşdirmə İnstitutunun ortodontiya kafedrasının rezidentləri də var idi. Bu, onların peşəkar inkişafında mühüm addım və institutun rezident hazırlığı sahəsində uğurunun bariz nümunəsi oldu.