Revmatoid artrit kompleks və çoxşaxəli patologiya hesab olunur. Bu xəstəliyin yalnız revmatoloji deyil, eyni zamanda ekstrarevmatoloji – yəni digər orqan və sistemlərə təsir göstərən – klinik, laborator, vizualizasiya ilə aşkarlanan təzahürləri və mövcuddur. Bu geniş spektrli simptomatikanı nəzərə alaraq, müasir sübutlu təbabət prinsiplərinə əsaslanan məlumatlar əsasında yeni klinik protokolun hazırlanması günün tələbidir.
Azərbaycan Respublikası Səhiyyə Nazirliyinin İctimai Səhiyyə və İslahatlar Mərkəzi (İSİM) tərəfindən yaradılmış klinik protokolun tərtibçilər heyətinə daxil olan Ə.Əliyev adına Azərbaycan Dövlət Həkimləri Təkmilləşdirmə İnstitutunun terapiya kafedrasının əməkdaşları t.ü.f.d. Fidan Qasımova, t.ü.f.d. Gülnarə Nur-Məmmədova, dosent Gülüstan Babayeva bu milli klinik protokolun hazırlanmasında aktiv iştirak etmişlər. Həmin protokolda revmatoid artritin diaqnostika və müalicəsinə dair yanaşmalarla yanaşı, digər sistemlərin zədələnməsi hallarında multidisiplinar əməkdaşlıq çərçivəsində tətbiq ediləcək müalicə və profilaktika prinsipləri də əhatə olunmuşdur.
Bu protokol həm tibb ictimaiyyəti, həm də pasiyentlərin sağlamlıq durumunun yaxşılaşdırılması baxımından böyük əhəmiyyət daşıyır və ölkəmizdə revmatoloji xidmətin keyfiyyətinin yüksəldilməsinə töhfə verəcəkdir. https://www.isim.az/upload/File/reports/revmartrit2025.pdf