Ə.Əliyev adına Azərbaycan Dövlət Həkimləri Təkmilləşdirmə İnstitutunun pediatriya kafedrasının assistenti Erkin Rəhimov 8-11 may 2025-ci il tarixlərində Meksikanın Mexiko şəhərində keçirilmiş Beynəlxalq Pediatriya Assosiasiyasının (International Pediatrician Assosiation -İPA) 31-ci konqresində iştirak etmişdir. Konqres çərçivəsində baş tutan səsvermə zamanı Azərbaycan pediatriyası üçün önəmli hadisə gerçəkləşmişdir. Belə ki, Azərbaycan Pediatriya Cəmiyyətinin sədr müavini Erkin Rəhimov səs çoxluğu ilə Mərkəzi Asiya regionunu təmsil etmək üçün İPA-nın Daimi Komitəsinə (Standing Committee) yenidən üzv seçilmişdir. Bu mühüm uğur Azərbaycan pediatriyasının beynəlxalq aləmdə artan nüfuzunun bariz göstəricisidir.
Eyni zamanda, konfrans çərçivəsində Erkin Rəhimov öz elmi işini əhatə edən “Yenidoğulmuşların tranzitor taxipnoe ilə respirator distres sindromunun differensial diaqnostikasında ağciyərlərin ultrasəs müayinəsinin və qanda biomarkerlərin rolu” və “Hüquqların Müdafiəsi: Pediatriyada Bioetik Dilemmaların Araşdırılması” mövzularında çıxışlar da etmişdir.