2025-ci il aprelin 24-dən 30-dək Ümumdünya İmmunlaşdırma Həftəsi keçirildi. Həftə ictimaiyyətin diqqətini bəşəriyyəti yoluxucu xəstəliklərdən qorumaq üçün əsas profilaktik tədbirlərdən biri kimi olan immunizasiyaya cəlb etmək məqsədi daşıyırdı. Azərbaycan Respublikası Səhiyyə Nazirinin 14 aprel 2025-ci il tarixli 3-28/3-1-114/2025 saylı “İmmunlaşdırma həftəsinin keçirilməsi barədə” əmrinə əsasən respublikanın bütün şəhər və rayonlarında hər hansı səbəbə görə vaksinasiyadan kənarda qalan uşaqların peyvəndlərə cəlb edilməsi ilə yanaşı tibb işçilərinin və əhalinin bu barədə maarifləndirilməsi kimi məsələlərin təşkili baş tutmuşdur.
İmmunlaşdırma həftəsi ilə bağlı Ə. Ə.Əliyev adına Azərbaycan Dövlət Həkimləri Təkmilləşdirmə İnstitutunun pediatriya kafedrasında Respublika Pediatriya Mərkəzi, Yasamal Uşaq Klinik Xəstəxanasının həkimləri üçün “Sağlam uşaq” adlı ixtisasartırma kursunda “Uşaqların immunizasıyası” mövzunda təlim keçirilmişdir. Təlimdə Azərbaycanda yeni peyvənd təqviminin tədbiqinə dair geniş məlumatlar təqdim edilmişdir. Təlimin sonunda tibb işçilərinin immunizasiyaya münasibəti və onların bu sahədə bilik və bacarıqlarını qiymətləndirmək üçün sorğu da aparılmışdır.