4-7 fevral 2025-ci il tarixində İtaliyanın Milan şəhərində Avropa Hemofiliya və Qan xəstəlikləri Assosiasiyasının 18-ci Beynəlxalq Hemofiliya konqresi (EAHAD- 2025) keçirilmişdir. Konqresdə ABŞ, Rusiya, Türkiyə, Niderland, Xorvatiya, Almaniya və s. ölkələrinin səhiyyə təşkilatçıları, alim- mütəxəssisləri ilə bərabər Azərbaycan nümayəndə heyəti də iştirak etmişdir.
Tədbirdə ölkəmizi Ə.Əliyev adına Həkimləri Təkmilləşdirmə İnstitutunun rektoru professor Nazim Qasımov, Hematologiya kafedrasının müdiri dosent Elmira Qədimova, İcbari Tibbi Sığorta üzrə Dövlət Agentliyinin (İTSDA) Tibbi planlama departamentinin rəhbəri professor Hikmət İbrahimli təmsil etmişdir.
Konfransda irsi qan xəstəlikləri müalicəsində gen terapiyası haqqında geniş müzakirələr aparılmışdır.
Çexiyadan olan prodessor Yan Blatneyin irsi xəstələrin gen terapiyası və monitorinqindən bəhs edən məruzəsi geniş maraqla qarşılanmışdır. Eyni zamanda konqresdə irsi qan xəstəliyi olan von Villebrand xəstəliyi mövzusu da geniş müzakirə olunmuşdur. İtaliyadan Mariya Elisa von Villebrand xəstələrinin statistikasından bəhs etmiş, Amerikadan Robert Sudokio von Villebrand xəstələrinin müalicəsinin yaxşılaşdırması və profilaktikası barədə geniş məruzə etmişdir. ABŞ alimi bildirmişdir ki, von Villebrand xəstələrinin dünyada cəmi 10% - i profilaktik müalicə alır.
Xorvatiyadan olan alim Anna Boban geniş məruzə ilə çıxış etmişdir. O məruzəsində profilaktik müalicə alan von Villebrand xəstələrində burun qanaxmaları, oynaqdaxili qanaxmalar, kəskin uşaqlıq qanaxmaları haqqında danışmışdır və göstərmişdir ki, belə xəstələrdə burun qanaxmaları 100%, oynaqdaxili qanaxmalar 76%, kəskin uşaqlıq qanaxmaları 80% azalır.
Almaniyadan Karmen Eskuriola ağır hemofiliyalı xəstələrin immun tolerantlıq induksiyası müalicəsindən bəhs etmişdir. Sonda interaktiv sual-cavab sessiyaları aparılmışdır.
Azərbaycan nümayəndə heyətinin rəhbəri professor Nazim Qasımov və nümayəndə heyətinin üzvləri Avropanın bir sıra ölkələri, Rusiya və Türkiyədən olan nümayəndə heyətləri ilə görüşlər keçirmiş, elmi nəticələr haqqında fikir mübadiləsi etmiş və əlaqələrimizin daha da genişlənməsi yolları haqqında müzakirə aparmışlar.