ÜST Azərbaycan nümayəndəliyinin Azərbaycanda tibbi tədris proqramlarının beynəlxalq təcrübəyə uyğunlaşdirilması və yerli mütəxəssislərinin bilik və bacarıqlarinın yenilənməsi və təkmilləşdirilməsi istiqamətində 2021-ci ildən başladığı fəaliyyət davam edir. Ə.Əliyev adına ADHTİ-də bu proqram çərçivəsində mütamadi tədbirlər keçirilir. Belə bir tədbir institutun pedaqogika, psixologiya və səhiyyənin təşkili və menecmenti kafedrasında ayın əvvəlində keçirilmişdir. Bu, 10 gün davam edən tibb təhsili müəssisələrinin pedaqoji heyəti üçün nəzərdə tutulan “Tibb elmlərinin tədrisi” kursu olmuşdur. Təlimdə institutun pediatriya, terapiya, şüa diaqnostikası, oftalmologiya, ümumi cərrahiyyə, yoluxucu xəstəliklər, anesteziologiya və reanimatologiya, nefrologiya kafedrasının əməkdaşları iştirak etmişlər.
Keçirilən kursda iştirakçılara tibbi tədris prosesində istifadə edilən üsul və yanaşmalar, tədris planlarının hazırlanması və istifadə edilən vəsaitlər barədə geniş məlumatlar təqdim edilmişdir. Bununla yanaşı iştirakçılar təlim mövzularına dair əldə etdikləri bilik və bacarıqları praktiki məşğələlərdə nümayiş etdirmişlər.
Təlimin son iki gün iştirakçıların tədris planlarının hazırlanmasına həsr edilmişdir. Hər bir iştirakçı üçün, təqdim etdiyi plana uyğun, həyata keçirdiyi dərsin 15 dəqiqəlik videoçəkilişi təşkil edilmişdir. Kursun son günündə bu videoçəkilişlər nümayiş olundu, rəylər səsləndirildi.
Sonda iştirakçılar təlimdə əldə edilən bilik və bacarıqlarını öz fəaliyyətlərində istifadə edəcəklərini səsləndirdilər.