Avropa İttifaqı tərəfindən maliyyələşdirilən “Vaksinasiyaya Dəstək” layihəsi çərçivəsində tibb işçilərinə peyvənd təcrübəsi üzrə təkmilləşdirilmiş təlimlərin keçirilməsi immunizasiya xidmətlərinin keyfiyyətini artırmaq üçün nəzərdə tutulmuşdur.
Bu layihə çərçivəsində Azərbaycan Respublikası Səhiyyə Nazirliyi yeni “Uşaqların immunizasiyası üzrə təlimat”ı təsdiqləmişdir. Bununla bağlı Ə.Əliyev adına Azərbaycan Dövlət Həkimləri Təkmilləşdirmə İnstitutunun pediatriya, ailə həkimi, nevrologiya kafedralarının təqvim planına immunizasiya ilə bağlı yeni kurslar daxil edilmişdir. İlk belə təlim pediatriya kafedrasında 16-27 sentyabr 2024-cü il tarixində “Uşaqların inkişafı və qidalanması. Yenidoğulmuşların fiziologiya və patologiyası” mövzusunda aparılan kurs çərçivəsində “Uşaqların immunlaşdırılması” adı ilə keçirilmişdir. Təlimdə pediatriya kafedrasının, ÜST tərəfindən həyata keçirilən “Vaksinasiya Dəstəyi” layihəsi çərçivəsində öncə təlimatlandırılmış əməkdaşları olan dosent M.Qaraxanova və assistent E.Zeynalova vaksinlərə əks göstərişlər, gecikmiş peyvənd cədvəli, peyvəndlərin saxlanması və daşınması, onların yan təsirləri və anafilaksiyanın idarə edilməsi, milli immunizasiya proqramına daxil olmayan vaksinlər, risk kommunikasiyaları haqqında müasir məlumatları müdavimlərə çatdırıb, həkimlərlə fikir mübadilsi aparmışlar.