12-14 sentyabr 2024-cü il tarixində Portuqaliyanın Porto şəhərində Avropa Helikobacter Pylori və Microbiotanın Öyrənilməsi Qrupunun (EHMSG) 37-ci konqresi keçirilmişdir. Konqres öncəsi milli koordinatorlar və TOGAS (mədə xərçənginin kanseroprevensiyası və skrininqı üzrə multisentrik tədqiqat) lahiyəsi üzrə ölkə təmsilciləri ilə görüşlər 11 sentyabr 2024-cü il tarixində keçirilmişdir.
EHMSC ənənəvi məqsədləri çərçivəsində hazırlanmış elmi proqram H.Pylorinin yayılmasının, yeni risk faktorlarının, intraqastral və ekstraqastral təzahürlərin və fəsadlaşmaların, erkən və adekvat diaqnostika və eradikasiya sxemlərinin seçimləri ilə yanaşı, H.pylori və mədə xərcənginə qarşı vaksinlərin hazırlanması məsələlərini də əhatə edirdi. Bu mövzular ilə yanaşı eradikasiya sxemlərində istifadə edilən antibioklər və onlara olan rezistentlik problemlərində son zamanlar (post-COVID dövründə) amoksisillinə olan rezistentlik üzrə yeni araşdırmalar və bu rezistentliyin həlli yolları işiqlandırılmışdır.
Ölkəmizi 31 ölkənin iştirakı ilə keçən bu konqresdə Ə.Əliyev adına Azərbaycan Dövlət Həkimləri Təkmilləşdirmə İnstitutunun terapiya kafedrasının dosenti, H. Pylori Avropa Registri üzrə milli koordinator Gülüstan Babayevanın rəhbərliyi ilə 8 həkim-qastroenteroloq təmsil etmişlər. Azərbaycan EHMSG-yə 2020-ci ildə, TOGAS-a 2023-cü ildə daxil olmasına baxmayaraq, aktiv tədqiqatda iştirakının nəticələri üzrə birinci 6 ölkə arasındadır. Bu dəfəki konqresə ölkəmiz 5 tədqiqat işinin nəticələrinə həsr edilmiş elmi işlərlə qatılmış idi. İnstitutun terapiya kafedrasının doktorantı, “German Hospital”-ın qastroenterologiya şöbəsinin müdiri Rəşad Həsənovun “Qida borusunun disfagiyası olan xəstələrdə H.pylorinin təsiri” mövzusunda tədqiqat işi xüsusi maraq ilə qarşılandı.