Hər il olduğu kimi dünyada 24 Mart Vərəmlə Mübarizə günü qeyd edilir. Vərəm mövzusu günün aparıcı mövzulardan biri olduğu üçün 2023-cü ildə ÜST “Bəli! Biz Vərəmə son qoya bilərik” şüarı altında bütün təşkilatları birləşməyə və mübarizə tədbirlərini birgə həyata keçirməyə çağırır.
Tibb işçilərinin daha da məlumatlı olması və əhali arasında uyğun şəkildə maariflədirmə işlərini aparması məqsədilə Ə.Əliyev adına ADHTİ-də mütəmadi olaraq ictimai səhiyyə ilə əlaqəli müxtəlif seminarlar təşkil edilir.
Pediatriya kafedrasında təkmilləşdirmə kurslarında iştirak edən həkimlər üçün belə bir seminar 24 Mart Vərəmlə Mübarizə günü ilə əlaqədar keçirilmişdir. Seminar iştirakçılarına ÜST-ün vərəmlə bağlı yeni təlimat və tövsiyələri kafedranın dosenti Mətanət Qaraxanova tərəfindən təqdim edilmişdir. Uşaq və yeniyetmələrdə vərəmin qarşısının alınması və müalicəsinin böyüklərdən geri qaldığını nəzərə alaraq ÜST tərəfindən “Uşaq və yeniyetmələrdə vərəmin idarə edilməsi üçün” yenilənmiş təlimatı nəşr olunmuşdur. ÜST-n bu gün açıqladığı təlimatın məqsədi uşaqlar və yeniyetmələr üçün fərq yaratmaq, onlara daha tez diaqnoz qoymaq və səhiyyə xidmətlərindən istifadə imkanlarını artırmaqdır. Həmin təlimat xəstələrdə sağlamlıq nəticələrinin yaxşılaşmasına və yoluxmanın azalmasına səbəb olacaqdır. Gənclərin həyatını xilas etmək və iztirabların qarşısını almaq üçün bütün ölkələrdə bu təlimatların tez bir zamanda, prioritet olaraq, tətbiq edilməsi ÜST tərəfindən tövsiyə edilir.