Azərbaycan səhiyyəsinə ağır itki üz vermişdir. Тibb üzrə elmlər doktoru, Ə.Əliyev adına ADHTİ-nun stomatologiya və üz-çənə cərrahiyyəsi kafedrasının professoru Mahir Məmməd oğlu Əliyev 2021-ci il aprelin 8-də vəfat etmişdir.
Mahir Məmməd oğlu Əliyev 1978-ci ildə ATU-nu fərqlənmə diplomu ilə bitirdikdən sonra birillik internatura keçmiş və 1982-ci ilədək Bakı şəhərində 5 saylı stomatoloji poliklinikada, Respublika stomatoloji mərkəzində həkim-stomatoloq işləmişdir. 1982-1986-ci illərdə Moskva şəhərində SSRİ Səhiyyə Nazirliyinin Mərkəzi Elmi Tədqiqat Stomatologiya institutunda məqsədli aspiranturada təhsil almış və “Клинико-морфологические и иммунологические аспекты красного плоского лишая, диагостика и принципы лечения” mövzusunda dissertasiya müdafiə edərək tibb elmləri namizədi alimlik dərəcəsi almışdır.
1986-cı ildə SSRİ Səhiyyə Nazirliyinin göndərişi ilə Ə.Əliyev adına ADHTİ-nun terapevtik stomatologiya kursuna assistent vəzifəsinə qəbul olunmuş, 1991-ci ildən 2017-ci ilədək həmin institutun stomatologiya və üz-çənə cərrahiyyəsi kafedrasının dosenti vəzifəsində çalışmışdır. 2011-ci ildə M.M.Əliyev “Ağız boşluğu selikli qişasının toksiki, allergik və keratoz xəstəliklərinin etio-patogeneik xüsusiyyətləri, diaqnostikası və müasir müalicə prinsipləri” mövzusunda dissertasiyasını müdafiə edərək tibb üzrə elmlər doktoru alimlik dərəcəsı almışdır. 2017-ci ildən stomatologiya və üz-çənə cərrahiyyəsi kafedrasının professoru idi.
Professor Mahir Məmməd oğlu Əliyevin tibbi kadrlarının ixtisaslaşması və təkmilləşməsində, səmərəli elmi-tədqiqat işlərinin aparılmasında böyük xidmətləri olmuşdur. O, dəfələrlə MDB və xarici ölkələrdə keçirilən qurultay, konqres və konfranslarda iştirak etmiş, əldə olunmuş yenilikləri müvəffəqiyyətlə səhiyyə praktikasına tətbiq etmişdir. M.M.Əliyev 180-dən çox elmi əsərin, 3 monoqrafiya, 3 dərslik (həmmüəllif), 9 dərs vəsaiti, 5 metodik tövsiyə, 2 patent və 4 səmərələşdirici təklifin müəllifidir.
Tanınmış alim, savadlı həkim və pedaqoq professor Mahir Məmməd oğlu Əliyevin xatirəsi onu tanıyanların qəlbində daim yaşayacaqdır.
Allah rəhmət eləsin!