Hazırkı dövrdə ən vacib məsələlərdən biri əhaliyə göstərilən tibbi yardımın keyfiyyətini yüksəldərək dünya standartlarına çatdırmaqdır. Dövlətimiz tərəfindən qarşıya qoyulan bu vacib məsələnin həlli yollarından biri də ali tibb kadrlarının hazırlığının səviyyəsinin artırılmasıdır. Belə bir şəraitdə Ə.Əliyev adına Azərbaycan Dövlət Həkimləri Təkmilləşdirmə İnstitutu öz işini müasir tələblərə uyğun qurmağa çalışır. Bununla əlaqədar yüksək ixtisaslı mütəxəssislərin hazırlanması və tibb elminin prioritet istiqamətlərinin inkişafı sahəsində beynəlxalq əməkdaşlıq Ə.Əliyev adına ADHTİ-nin fəaliyyətinin əsas istiqamətlərindən biridir. Institutun beynəlxalq əlaqələrinin inkişafı strategiyası institutun ali tibb təhsilli həkim və mütəxəsislər üçün diplomdansonrakı müasir, yüksək professional təhsil mərkəzi kimi imicinin möhkəmlənməsinə yönəlmişdir. Artıq ADHTİ ilə Almaniyanın, Türkiyənin, Rusiyanın, Belarusiyanın və digər ölkələrin tanınmış bir sıra təhsil müəssisələri ilə faydalı və sıx əməkdaşlıq mövcuddur ki, bu da tədris, elmi və müalicə prosesinə müasir, qabaqcıl texnologiyaları tətbiq etməyə imkan verir. Beynəlxalq əlaqələrin genişlənməsində institut rəhbərliyinin növbəti addımı 06 noyabr 2017-ci ildə Daşkənt Həkimləri Təkmilləşdirmə İnstitutu ilə memorandum imzalanması olmuşdur. Memorandumda hər iki institut arasında həkim-rezidentlərin rotasiyaları, müxtəlif ixtisaslar üzrə həkimlərin təkmilləşdirmə kurslarında iştirakı təsbit edilmişdir. Daşkənt Həkimləri Təkmilləşdirmə İnstitutunun nevrologiya kafedrasının müdiri professor Elbek Mircurayev memorandumun həmin institutun rektoru professor Xabibulla Akilov tərəfindən imzalanmış nüsxəsini təqdim etdikdən sonra memorandum Ə.Əliyev adına ADHTİ-nun rektoru professor Nazim Qasımov tərəfindən imzalanmış və təsdiqlənmişdir. Memorandum iki ali təhsil ocağı arasında qarşılıqlı əlaqələri daha da inkişaf etdirəcək və səhiyyə mütəxəssislərinin bilik və bacarıqlarıni müasir standartlara çatdırmaq üçün zəmin yaradacaqdır.