Ə.Əliyev adına Azərbaycan Dövlət Həkimləri Təkmilləşdirmə İnstitutu Azərbaycan Respublikası Nazirlər Kabinetinin Sərəncamı və Səhiyyə Nazirliyinin 19 may 2026-ci il 3-28/3-1-305/2026 saylı əmri ilə tibb üzrə fəlsəfə doktoru proqramı üzrə büdcə hesabına və ödənişli əsaslarla qiyabi doktoranturaya sənəd qəbulu elan edir. Sənədlərin qəbulu portal.edu.az saytından “Şəxsi kabinet” vasitəsilə elektron formada həyata keçirilir. Şəxsi kabinetə sənədlər yerləşdirilməklə yanaşı mütləq həmin sənədlərlə elmi hissəyə müraciət etmək lazımdır.
Sənəd qəbulu 19.05.2026-cı il tarixindən 09.06.2026-ci il tarixinə kimi saat 18.00 qədər aparılacaqdır.

Tibb üzrə fəlsəfə doktoru proqramı üzrə doktoranturaya Azərbaycan Respublikasının vətəndaşları müsabiqə əsasında qəbul olunurlar.
Doktoranturanın (keçmiş aspiranturanın) tam kursunu bitirən şəxs eyni ixtisas üzrə təkrarən doktoranturaya qəbul oluna bilməz.

Doktoranturaya qəbul üçün institutun Elmi Tədqiqatlar şöbəsinə aşağıdakı sənədlər təqdim edilir:
1. Ərizə (doktoranturanın fəaliyyət göstərdiyi müəssisənin və yaxud təşkilatın rəhbərinin adına);
2. Kadrların şəxsi-qeydiyyat vərəqi (təsdiq olunmuş);
3. Tərcümeyi-hal;
4. İş yerindən xasiyyətnamə (təsdiq olunmuş);
5. İş stajı olanlar üçün əmək kitabçasından çıxarış (təsdiq olunmuş);
6. Çap olunmuş elmi işlərin siyahısı (təsdiq olunmuş), onların surətləri və ya seçilmiş ixtisas üzrə referat;
7. Ali təhsil müəssisəsini bitirmək haqqında diplomun, internaturanın və ya rezidenturanın müvafiq qaydada (notarial olaraq) təsdiq edilmiş surəti (xarici ölkələrdə təhsil almış Azərbaycan Respublikasının vətəndaşları üçün təhsil haqqında sənədlərin tanınması haqqında şəhadətnamə);
8. Şəxsiyyəti təsdiq edən sənədin surəti.

Qeyd: Ərizədən başqa bütün sənədlər şəxsi kabinetə yerləşdirilməlidir.

Xarici dildən imtahanda keçid balını toplayan şəxslər fəlsəfədən imtahana buraxılırlar. Xarici dil üzrə qüvvədə olan beynəlxalq dil sertifikatına (IELTS, TOEFL, Cambridge English Qualifications, TestDaF, DELF, DALF, STANAG) malik olanlar xarici dil üzrə qəbul imtahanından azad olunurlar. Həmin şəxslər sertifikatlarının surətini DİM təqdim etməlidirlər və DİM tərəfindən sertifikatın orijinallığı və verifikasiyası haqqında verilən arayış almalıdırlar. Beynəlxalq dil sertifikatlarının imtahan nəticələrinin keçid balına ekvivalentliyi Səhiyyə Nazirliyi ilə razılaşdırılmaqla, DİM tərəfindən müəyyənləşdirilir.