Ə.Əliyev adına Azərbaycan Dövlət Həkimləri Təkmilləşdirmə İnstitutunun ortodontiya kafedrasında yüksək ixtisaslı mütəxəssislərin hazırlanması məqsədilə tədris prosesinin müasir standartlara uyğun təşkili və innovativ rəqəmsal texnologiyaların tətbiqi prioritet istiqamətlərdəndir.
Bu baxımdan Dolphin Imaging (versiya 12) proqramının istifadəsi xüsusi əhəmiyyət daşıyır. Proqram vasitəsilə yan və frontal sefalometrik rentgenlərdə dəqiq ölçmələr aparılır, modellərin analizi həyata keçirilir və Treatment Simulation funksiyası ilə müalicənin yekun nəticələri əvvəlcədən proqnozlaşdırılır.
Aparılan ölçmələr əsasında dişlərin çəkilməsi ilə və ya diş çəkimi olmadan ortodontik müalicə variantlarının seçilməsi mümkündür. Eyni zamanda ortoqnatik cərrahiyənin planlaşdırılması, skelet və yumşaq toxuma dəyişikliklərinin əvvəlcədən qiymətləndirilməsi və əməliyyat sonrası nəticələrin vizuallaşdırılması imkanı yaradılır.
Bu yanaşma həkimə müxtəlif müalicə planlarını müqayisə etməyə və seçilmiş metodun üstünlüklərini pasiyentə aydın şəkildə izah etməyə imkan verir. Tədris prosesi yalnız nəzəri biliklərin ötürülməsi ilə məhdudlaşmır, eyni zamanda rezident və müdavimlərin praktik bacarıqlarının və klinik düşüncə tərzinin inkişafına yönəldilir ki, bu da düzgün diaqnozun qoyulması və optimal müalicə planının seçilməsi baxımından mühüm əhəmiyyət kəsb edir.