Uşaqların fiziki və mənəvi cəhətdən sağlam, hərtərəfli inkişaf etmiş və cəmiyyət üçün faydalı şəxsiyyətlər kimi yetişdirilməsi dövlətlə yanaşı, cəmiyyətin hər bir üzvünün üzərinə mühüm vəzifələr qoyur. Bu baxımdan uşaq hüquqlarının qorunması, onların hüquq və azadlıqlarının təşviqi, eləcə də bu sahədə ictimai maarifləndirmənin gücləndirilməsi xüsusi əhəmiyyət kəsb edir.
Uşaq hüquqlarının səmərəli müdafiəsinin təmin edilməsi və təşviqi məqsədilə Azərbaycanda hər il 20 oktyabr – 20 noyabr tarixləri “Uşaq Hüquqları Aylığı” elan olunur. Bu il də Azərbaycan Respublikasının İnsan Hüquqları üzrə Müvəkkili (Ombudsman) aidiyyəti dövlət qurumlarına və təşkilatlara müraciət edərək onları “Uşaq Hüquqları Aylığı” çərçivəsində keçirilən tədbirlərə qoşulmağa, uşaq hüquqlarının müxtəlif aspektləri üzrə araşdırmalar aparmağa, maarifləndirmə və təşviqat tədbirlərinin təşkilinə dəstək göstərməyə çağırmışdır.
Ombudsmanın bu çağırışına dəstək olaraq, Ə.Əliyev adına Azərbaycan Dövlət Həkimləri Təkmilləşdirmə İnstitutunun pediatriya kafedrası tərəfindən aylıq çərçivəsində bir sıra maarifləndirici seminarlar təşkil edilmişdir. Belə ki, müvafiq dövrdə keçirilən ixtisasartırma kursları zamanı, eləcə də Respublika Pediatriya Mərkəzinin Yasamal Uşaq Klinik Xəstəxanasında və Ə.Qarayev adına Uşaq Klinik Xəstəxanasında müdavimlər, həkimlər və rezidentlər üçün “Uşaq hüquqlarının müdafiəsi” mövzusunda seminarlar keçirilmişdir.
Seminarlarda kafedranın dosenti Mətanət Qaraxanova təqdimatlarla çıxış edərək pediatrların peşə fəaliyyətində uşaq hüquqlarının qorunmasının əhəmiyyətindən, uşaqların hüquqlarının təmin olunmasında tibb işçilərinin məsuliyyət və vəzifələrindən, habelə bu sahədə həkimlərin rolundan bəhs etmişdir.
Tədbirlərdə uşaq hüquqlarının müdafiəsinin yalnız hüquqi deyil, həm də mühüm tibbi və sosial məsuliyyət olduğu vurğulanmış, pediatrların gündəlik peşə fəaliyyətində uşaqların hüquqlarına həssas yanaşmasının və bu istiqamətdə məlumatlılığının artırılmasının vacibliyi diqqətə çatdırılmışdır.