19-21 iyun 2026-cı il tarixlərində Azərbaycan Dermatoveneroloqlar Assosiasiyasının (ADVA) 5-ci Beynəlxalq Dermatoveneroloqlar və Dermatokosmetoloqlar Konqresi keçirildi. Konqresdə 14 ölkədən 19 xarici və Azərbaycandan 20-dən çox məruzəçi iştirak etdi. Tədbirdə 400-dən çox iştirakçı qeydiyyatdan keçmişdi.
Açılış mərasimində Ə.Əliyev adına Azərbaycan Dövlət Həkimləri Təkmilləşdirmə İnstitutunun rektoru professor Nazim Pənahov, Romanın "G. Marconi" Universitetinin Dermatologiya və Venerologiya kafedrasının tam professoru və müdiri professor Torello Lotti, Qazaxıstan Elmlər Akademiyasının akademiki, Qazaxıstan Dermatovenerologiya Assosiasiyasının sədri professor Gülnar Batpenova və Gürcüstan Dermatovenerologiya Assosiasiyasının sədri professor Lali Mekokişvili çıxış edərək konqres iştirakçılarına uğurlu fəaliyyət arzuladılar. Mərasimdə Ə.Əliyev adına ADHTİ-nin dermatovenerologiya kafedrasının müdiri, Azərbaycan Dermatoveneroloqlar Assosiasiyasının sədri Sənan Kərimova Sürix Universitetinin fəxri professoru adının verilməsi haqqında sertifikat təqdim olundu.
İlk İki gün ərzində elmi sessiyalarda dermatovenerologiya, dermatoonkologiya və dermatokosmetologiyanın müxtəlif problemlərinə dair 40-dan çox məruzə dinlənildi. İyunun 21-də isə dermatologiyada müxtəlif lazer texnologiyaları və dermatoskopiya üzrə master-klasslar təşkil edildi.
Konqresdə Ə.Əliyev adına Azərbaycan Dövlət Həkimləri Təkmilləşdirmə İnstitutunun dermatovenerologiya kafedrasının müdiri, Azərbaycan Dermatoveneroloqlar Assosiasiyasının sədri Sənan Kərimov, həmin kafedranın professoru Mir-Riad Cavad-zadə həm məruzəçi, həm də moderator, institutun pediatriya kafedrasının əməkdaşları dosent, t.e.d. Nailə Rəhimova və dosent Nigar Hacıyeva məruzəçi olaraq iştirak etdilər.