Hər il dünyada 14 iyun Ümumdünya Qan Donoru Günü kimi qeyd edilir. Həmin gün bir daha vurğulanər ki, hər bir donorluq tibbi aktdan daha üstün bir məna kəsb edir: o, həmrəyliyin, mərhəmətin və kollektiv məsuliyyətin güclü bir təzahürüdür. Bu il Ümumdünya Qan Donoru Gününün mövzusu “İnsanlığın bir damlası: qan ver, həyat xilas et!” ifadəsi olmuşdur.
Ə.Əliyev adına ADHTİ-nin pediatriya kafedrasında “Qan dövranı xəstəlikləri” kursunda bu mövzuya xüsusi yer ayrılıb. Həmin kursda kafedranın dosenti Mətanət Qaraxanova müdavimlərə Ümumdünya Səhiyyə Təşkilatının təhlükəsiz və adekvat qan tədarükünün təmin edilməsi, davamlı və keyfiyyətli qan xidmətlərinin cəmiyyətin sağlamlığında, habelə fəlakətlərə hazırlıqda və onlara qarşı cavab tədbirlərinin görülməsində mühüm rol oynadığı barədə məlumatları təqdim etdi. Bunlarla yanaşı təqdimatda qanın bir çox müxtəlif məqsədlər üçün istifadə edilməsi, o cümlədən cərrahiyyə əməliyyatına məruz qalan pasiyentlərə kömək edilməsi, anemiya və malyariya kimi xəstəliklərin müalicəsi, kimyaterapiya alan pasiyentlərə qulluq göstərilməsi, doğuş zamanı fəsadları olan qadınlara dəstək verilməsi və digər mühüm məqamlar barədə də məlumatlar verildi. Bir daha qeyd edildi ki, qan donorluğu bir həmrəylik aktıdır və tibb işçiləri könüllü təmənnasız qan donorluğunun inkişafında vacib rol oynayırlar.