Ə.Əliyev adına Azərbaycan Dövlət Həkimləri Təkmilləşdirmə İnstitutu həkimlərin və əczaçıların elmi-texniki tərəqqinin müasir səviyyəsinə və ölkəmizin təhsil standartlarına uyğun ixtisasartırma və kadrların yenidən hazırlanmasını təmin edən ali təhsil müəssisəsidir. Yarandığı gündən keçən 90 il ərzində institut şanlı tarix yaşamış, tanınmış ali təhsil ocağına çevrilmişdir. Respublikamızın səhiyyəsinin inkişafında institutun rolu danılmazdır.
Azərbaycan Respublikası Səhiyyə Nazirliyinin dəstəyi ilə 19.12.2025-20.12.2025-ci il tarixində keçirilən Ə.Əliyev adına ADHTİ-nin 90 illik yubileyinə həsr edilmiş beynəlxalq elmi-praktiki konqresin də gündəliyinin əsas mövzusu qazanılmış elmi nailiyyətlərin ölkəmizin tibb ictimaiyyətinə təqdim edilməsi olmuşdur.Konqres bu gün öz işini davam etdirdi.Tədbirin ikinci gününün açılış mərasimində institutun rektoru professor Nazim Pənahov bir daha Ə.Əliyev adına ADHTİ- nin bu illər ərzində əldə etdiyi nailiyyətlərdən ətraflı danışdı və institutun inkişafı üçün planlaşdırılan işlər haqqında məlumat verdi. Bir daha Azərbaycan Respublikası Səhiyyə Nazirliyinə verilən dəstək üçün minnətdarlıq bildirildi.
Konqres iştirakçılarına institutun tarixinə və fəaliyyətinə həsr olunmuş sənədli film nümayiş etdirildi.
Sonra konqres öz işini həmin günə planlaşdırılmış 1 plenar iclas və 5 elmi paneldə 68 alimin öz elmi-tədqiqat işlərinin nəticələrinə həsr olunmuş çıxışları ilə davam etdirdi.
Bununla da Ə.Əliyev adına ADHTİ-nin 90 illik yubileyinə həsr edilmiş beynəlxalq elmi-praktiki konqres öz işini müvəffəqiyyətlə başa çatdırdı.