Azərbaycan Respublikası Səhiyyə Nazirliyi Ə.Əliyev adına Azərbaycan Dövlət Həkimləri Təkmillədirmə İnstitutunun rektoru professor Nazim Pənahov ilə institutun 90 illik yubiley tədbirlərində iştirak etmək üçün ölkəmizdə səfərdə olan Çex Respublikası Həkimlərin və Əczaçıların Təkmilləşdirilməsi İnstitutunun Xarici işçilərin təhsili şöbəsinin rəhbəri Nikola Dopitova arasında görüş keçirildi. Görüş zamanı Azərbaycanda və Çex Respublikasında diplomdan sonrakı tibb təhsilinin mövcud vəziyyəti, diplomdan sonrakı davamlı tibb təhsili üzrə fəaliyyətlərin akkreditasiyası sistemlərinin qarşılıqlı tanınması sahəsində əməkdaşlıq, iki qurum arasında elmi-tədqiqat layihələrində qarşılıqlı faydalı əməkdaşlıq, birgə (kooperativ) tədqiqatların perspektivləri müzakirə olundu. Eyni zamanda tərəflər hər iki respublikada səhiyyənin inkişafı, İctimai Səhiyyənin İdarəedilməsi (Master of Public Health) proqramı üzrə birgə təlimlərin keçirilməsi perspektivləri, müəllim və rezidentlərin qarşılıqlı mobilliyi, tərəflər arasında artıq mövcud olan Akademik Əməkdaşlıq haqqında Razılaşmanın bəndlərinin həyata keçirilməsi kimi məsələləri də müzakirə etdilər və müvafiq Memorandum imzaladılar.
Görüş çox məhsuldar və qarşılıqlı anlaşma şəraitində keçirildi.