Ə.Əliyev adına Azərbaycan Dövlət Həkimləri Təkmillədirmə İnstitutunda Ümummilli Lider Heydər Əliyevin anım gününə həsr olunan rektorluğun iclası keçirildi. İclası institutun rektoru professor Nazim Pənahov giriş sözü ilə açaraq tədbirin Ümummilli Lider Heydər Əliyevin vəfatının 22-ci ildönümünə həsr olunduğunu bildirdi.
İclas iştirakçıları Heydər Əliyevin xatirəsi bir dəqiqəlik sükutla yad etdi.
Çıxışına davam edən rektor müstəqil Azərbaycan dövlətinin qurucusu və memarı olan Ulu Öndərin dünyanın nadir siyasətçilərindən biri olduğunu qeyd etdi və Heydər Əliyevin çoxşaxəli fəaliyyətindən, Azərbaycanın inkişafı və milli dövlətçiliyin gücləndirilməsi istiqamətində misilsiz tarixi xidmətlərindən, böyük xilaskarlıq missiyasından danışdı. Sonra professor Nazim Pənahov qeyd etdi ki, Azərbaycan xalqı hər il Ümummilli Liderini dərin ehtiram və minnətdarlıq hissi ilə anır. Ulu Öndərin əziz xatirəsi hər zaman yaddaşlarda qalacaq, onun göstərdiyi yol heç vaxt unudulmayacaqdır.
Rektor sözunə davam edib vurğuladı ki, bu gün ölkəmizdə Heydər Əliyev ənənələri davam edir və həmin kursun layiqli davamçısı Prezident İlham Əliyev Azərbaycanı güclü dövlətə çeviribdir. Azərbaycan bir çox sahədə əldə etdiyi nəticələrə görə bölgədə və dünyada söz sahibi olan bir ölkə olmuşdur. Bu nəticənin əldə olunmasında Prezident İlham Əliyevin gərgin əməyi, uzaqgörən xarici və daxili siyasəti dayanır.
İclasda çıxış edən Ə.Əliyev adına ADHTİ-nin hematologiya kafedrasının müdiri dosent Elmira Qədimova Ümummilli Lider Heydər Əliyevin həyat və fəaliyyətinə həsr olunmuş məruzə ilə çıxış edib onun Vətən və xalq qarşısındakı misilsiz tarixi xidmətlərindən danışdı.
Ə.Əliyev adına ADHTİ-nin prorektoru t.e.d. Adilə Rzayeva çıxış edib bildirdi ki, Ümummilli lider Heydər Əliyev əbədiyyətə qovuşmasına baxmayaraq, onun ideyaları yaşayır və Azərbaycanın işıqlı gələcəyinə xidmət edir. Azərbaycan xalqı Heydər Əliyev şəxsiyyətini həmişə uca tutaraq, əbədiyaşar liderimizin Vətən uğrunda həyata keçirdiyi tarixi missiyanı yüksək qiymətləndirir.
İclasın sonunda çıxış edən rektor professor Nazim Pənahov bir daha qeyd etdi ki, müstəsna xidmətləri ilə əbədilik qazanan ümummilli lider Heydər Əliyevin mənalı həyat yolu, zəngin və çoxşaxəli irsi hamımız üçün tükənməz ibrət məktəbidir və onun xatirəsi Azərbaycan xalqının qəlbində əbədi yaşayacaqdır.