Ə.Əliyev adına Azərbaycan Dövlət Həkimləri Təkmilləşdirmə İnstitutunda Davamlı Tibbi Təhsilin fasiləsizliyinin təmin olunması üçün diplomdansonrakı tibb təhsilinin təkmilləşdirilməsi, onun keyfiyyətinin yüksəldilməsi istiqamətində daimi axtarışlar aparılır, təhsilin yeni forma və metodları praktikaya daxil edilir. Bu məsələlərin həll edilməsi üçün institut müdavimlərinin praktik hazırlığına xüsusi fikir verilir. Həmin iş institutun kiniki bazalarında həyata keçirilir. Uzun illərdir ki, Respublaknın aparıcı tibb müəssisələrinin bir çoxu institutun kliniki bazası kimi fəaliyyət göstərmişlər. Hal-hazırda qanunvericilikdə baş vermiş dəyişikliklər nəticəsində həmin bazalarla bağlanmış müqavilələrin yenilənməsinə zərurət yaranmışdır. Qarşılıqlı əməkdaşlıq haqqında ilk müqavilələr akademik M.Ə.Mirqasımov adına Respublika Klinik Xəstəxanası və Sabunçu Tibb Mərkəzinin 3 saylı Şəhər Klinik Xəstəxanası ilə bağlanmışdır.
Müqavilələr həkim-mütəxəssis hazırlığının səmərəliliyinin artırılmasını, təhsilin keyfiyyət səviyyəsinin beynəlxalq tibb təhsil sistemi prinsiplərinə uyğunlaşdırılmasını, rezidentura və doktorantura təhsili alan həkimlərin həmin tibb müssisələrində təcrübə keçmələri ilə yanaşı,institutun həmin bazalarda yerləşən kafedra əməkdaşlarının müalicə və konsultasiya yardımının aparılmasında yaxından iştirakını nəzərdə tutur.
18 fevral 2023-cü il tarixində Ə.Əliyev adına ADHTİ-də akademik M.Ə.Mirqasımov adına Respublika Klinik Xəstəxanası ilə müqavilənin imzalanması tədbirində institutun rektoru professor Nazim Qasımov çıxış edərək bildirdi ki, mövcud olduğu illər ərzində institutun Respublikamızın səhiyyəsinin inkişafında rolu danılmazdır. Beləki, Azərbaycanın, demək olar ki, bütün həkim və provizorları, bir çox xarici ölkə vətəndaşları institutda ixtisaslaşma və ya ixtisasartirma kursları keçmiş və öz peşə karyeralarını qurmuşlar. İnstitutda aparılmış eimi-tədqiqat işləri keçmiş Sovetlər İttifaqında və müasir tibb dünyasında yenilik kimi tanınmış, təbabət tarixinə şanlı səhifələr kimi daxil olmuşdur. İnstitut əməkdaşlarinin şəfa verdiyi on minlərlə xəstələr ölkəmizin və xalqımızın rifahı üçün çalışmış və indi də çalışırlar. Bu gün səhiyyə sisteminin modernizasiyası və innovasion inkişafı şəraitində istifadə edilən tibbi texnologiyaların, müasir diaqnostika, müalicə, profilaktika və reabilitasiya metodlarının kliniki, sosial və iqtisadi effektliliyini təmin edə bilən tibbi kadrlara böyük ehtiyac duyulur. Belə yüksəkixtisaslı mütəxəssislərin hazirlanması üçün institut əməkdaşları bütün texniki vasitələrdən və innovasion texnologiyaların verdiyi imkanlardan maksimum yararlanaraq tam həçmdə fəaliyyətlərini davam etdirirlər. Bu işlərin həyata keçirilməsi üçün ölkəmizin praktiki səhiyyəsində önəmli yer tutan tibb müəssisələri ilə birgə fəaliyyət göstərmək vacib şərtlərdəndir və bağlanan müqavilələr bu işin qanuni əsaslarını yaradır.
Çıxış edən akademik M.Ə.Mirqasımov adına Respublika Klinik Xəstəxanasının direktoru Elviz Qasımov qarşılıqlı əməkdaşlığın səhiyyənin inkişaf etdirilməsi, xəstəxanada tibbi xidmətin keyfiyyətinin artırılması, rezident və doktorantların təcrübə keçmələrinin onların bilik, bacarıq və peşəkar vərdişlərinin inkişaf etdirilməsi üçün önəmli olduğunu qeyd etdi.
Ertəsi gün Ə.Əliyev adına ADHTİ ilə Sabunçu Tibb Mərkəzinin 3 saylı Şəhər Klinik Xəstəxanası ilə də müqavilə imzalanması mərasimi baş tutdu. Müqaviləni Ə.Əliyev adına ADHTİ-nin rektoru professor Nazim Qasımov və Sabunçu Tibb Mərkəzinin direktoru Fikrət Zeynalov imzaladılar.