Əməkdaşımız Qırğızıstan Otorinolarinqologiya Cəmiyyətinin 6-cı konqresində iştirak etmişdir

28.06.2022

Ə.Əliyev adına Azərbaycan Dövlət Həkimləri Təkmilləşdirmə İnstitutunun otorinolarinqologiya kafedrasının dosenti Ramil Həşimli 24-25 may tarixlərində Bişkek şəhərində keçirilən Qırğızıstan Otorinolarinqologiya Cəmiyyətinin 6-cı konqresində iştirak etmişdir.
Konqresin ilk günündə dosent R.Həşimli Qırğızıstan Tibb Akademiyası otorinolarinqologiya kafedrasındakı həmkarlarına və gənc həkimlərə "Səs xəstəliklərinin müalicəsi" mövzusunda seminar keçmiş və onlarla bərabər səs problemləri olan xəstələrin müayinəsini həyata keçirmişdir. Eyni zamanda konqresin elmi proqramında həm "Foniatriyanın əsasları" mövzusunda çıxış etmiş, həm də "Gənc otorinolarinqoloqlar" panelində moderator kimi iştirak etmişdir. Əməkdaşımız tərəfindən keçirilmiş seminar və xəstə müayinəsi sonrası çox saylı gənc qırğız otorinolarinqoloqlar institutumuza gələrək, "foniatriya" sahəsində öz bilik və bacarıqlarını artırmaq, kafedramızın əməkdaşlarının təcrübəsindən öyrənmək istəklərini bildirmişlər. Konqres prezidenti tərəfindən elmi işə göstərdiyi dəstəyə görə Fəxri fərman və qırğız milli geyimi ilə təltif olunmuşdur.
Dosent Ramil Həşimli konqresə müxtəlif ölkələrdən qatılan həmkarları Azərbaycan Otorinolarinqologiya Cəmiyyətinin sentyabrda keçiriləcək konqresinə dəvət etmişdir. Konqresin gedişində əməkdaşımızın Baş katibi olduğu Mərkəzi və Qərbi Asiya Qulaq, burun, boğaz və baş boyun cərrahiyyəsi cəmiyyəti İdarə Heyətinin iclası keçirilmiş, görülmüş və görüləcək işlər müzakirə olunmuş və Bakıda sentyabr ayında keçiriləcək konqresdə genişləndirilmiş İdarə Heyəti iclasında növbəti iki il üçün fəaliyyət planının müzakirə olunaraq qəbul olunması qərarı alınmışdır.

Hörmətli dostlar!

Azərbaycanın və keçmiş Sovet məkanının qocaman ali tibb təhsil müəssisələrindən biri olan institutun saytına xoş gəlmisiniz.

Bizim institut 80 ildir ki, milli səhiyyənin, ümumilikdə ali tibb təhsilinin inkişafını, həkimlərin ixtisaslaşma və təkmilləşdirməsini müvəffəqiyyətlə təmin edir. İnstitut həkimlərin tibb təhsilində biliklərinin yüksəlməsi, fundamental təbabətin yeni nailiyyətlərinə yiyələnməsi, kliniki təcrübəyə diaqnostikanın müasir üsullarını tətbiq etməsinə nail olmağı öz üzərinə vəzifə kimi götürür. Bunlar da XXI əsrdə inkişaf edən təbabət elminin ayrılmaz atributları sayılır. İnstitutun ilk rektorları professor V.A. Tarnoqradski, M.M. Əfəndiyev və B.A. Ağayev olmuşdur. İnstitutun dirçəlməsində akademik Əziz Əliyevin böyük rolu olmuşdur. Kollektivin vəsadəti ilə Nazirlər Kabinetinin qərarı əsasında 1962-ci ildən institut onun adını daşıyır. Bu müddətdə M. Məmmədov, M.X. Yaqubov, S.M. Qusman, İ.İ. Lukov, S.Q. Şteyn, N.M. İsrafilova, P.P. Popov, S.İ.Vəlixan və s. kimi Azərbaycan təbabətinin istedadlı, yüksək ixtisaslı həkim kollektivi formalaşmışdır.

Davamını oxu