Ə.Əliyev adına Azərbaycan Dövlət Həkimləri Təkmilləşdirmə İnstitutunun Elmi-Tibbi kitabxanası tədris və elmi işlərin həyata keçirilməsinə kömək edən elmi, informasiya və ideoloji bölmədir. Kitabxana institutumuzun elmi-tibbi və mədəni-maarif ocagı olaraq professor-müəllim heyətinə, elmi işçilərə, rezidentlərə və müdavimlərə xidmət edir. Kitabxananın resursları davamlı olaraq artırılır. 2024-cü ildə 822 müxtəlif nəşr əlavə olunmaqla ümumi fondun sayı 22072-yə çatdırılmışdır. 2024-cü ildə institutun Elmi-Tibbi kitabxanası elektron resursları ilə Respublika Tibb Kitabxanasının elektron resurslarına inteqrasiya olunmuş və bununla da vahid link vasitəsilə hər iki kitabxananın elektron fondlarında olan nəşrlərdən yararlanmaq mümkün olmuşdur.
Son dövrlərdə müasir tibbi informasiyaya əlçatanlığı təmin etmək məqsədilə institutun maliyyə imkanları hesabına beynəlxalq tibbi internet mənbələrinə (BMJ, hazırda UpToDate) bütün il boyu abunəlik təşkil olunaraq professor-müəllim heyəti, rezidentlər və həkim-müdavimlər üçün ödənişsiz istifadə imkanları yaradılmışdır. İnstitutun rəsmi saytının “Elektron kitabxana” bölməsində videomühazirələr, elektron tibbi kitablar, müxtəlif klinik nozologiyalara həsr olunmuş tibbi protokollar, institut əməkdaşlarının nəşr etdirdikləri dərsliklər, dərs və metodik vəsaitlər və s. yerləşdirilmişdir.
Kitabxana fondunun komplektləşdirilməsinin yollarından biri də müəllif təşkilatlar tərəfindən kitabların bagışlanılmasıdır. Bu günlərdə institutun rektoru professor Nazim Pənahov kitabxana fondunun zənginləşdirilməsi məqsədilə müəllifi olduğu və üç dildə (Azərbaycan, Rus və İngilis) nəşr olunmuş kitabların nüsxələrini Elmi-Tibbi kitabxanaya hədiyyə etmişdir. Həmin kitablar ortopedik stomatologiya fənninin aktual problemlərinə həsr olunmuş və son illərdə nəşr edilmiş monoqrafiyalardan və dərslikdən ibarətdir. Həmin kitabların kitabxana fondunda olması istifadəçilər üçün onları daha əlçatan etmişdir. Kitablar kitabxana kollektivi tərəfindən razılıq hissi ilə qəbul edilmişdir.